Flash Sale! to get a free eCookbook with our top 25 recipes.

طريقة عمل بيكاتا الفراخ بالمشروم

طريقة تحضير بيكاتا الدجاج

لــ عمل بيكاتا الفراخ ( الدجاج ) هنحتاج الأتي : 

  • نص كيلو صدور فراخ متقطعة شرايح رفيعة .
  • ربع كيلو مشروم فريش وممكن نستخدم المعلب .
  • بصلة متقطعة صغير .
  • معلقة صغيرة توم مفروم .
  • كوب كريمة طبخ ( ولو مفيش البديل هيبقي نص كباية لبن علي نص كباية قشطة ) .
  • دقيق.
  • ملح وفلفل أسمر .
  • رشة سكر .
  • رشة بابريكا .
  • كوب ماء ساخن مغلي .
  • سمنة أو زبدة و زيت .
  • مكعب ماجي مرقة دجاج .
  • للتزيين  رشة بقدونس وشرايح ليمون ( إختياري أنا معملتهاش الخطوة دي ) .

    طريقة تحضير بيكاتا الدجاج : 

  • نتبل الفراخ بتاعتنا قطعة قطعة بالملح والفلفل الأسمر ورشة بابريكا بسيطة وبعدين نحط قطع الفراخ تتغلف في الدقيق ونجيب حلة أو طاسة ونحط فيها سمنة علي معلقتين زيت ونرفعها علي درجة حرارة متوسطة وأما تسخن ننزل بالفراخ ونحمرها من الناحيتين لحد ما تاخد اللون الدهبي .
  • ننضف المشروم بفوطة نضيفة أو بمناديل مطبخ لأنه مينفعش يتغسل وبعدين نقطعه شرايح رفيعة .
  • نفس الحلة اللي حمرنا فيها الفراخ منغسلهاش هنكمل فيها عادي وهنضيف عليها معلقتين سمنة ونرفعها علي النار وننزل بالبصل وعليه رشة بسيطة سكر ونقلب كله علي النار لحد ما البصل يدبل وبعدين نضيف التوم المفروم ونقلبهم في بعض وأول ما نشم ريحتهم طلعت نضيف المشروم ونقلب لحد ما المشروم يدبل ولونه يتغير وبعدين نضيف معلقتين كبار من الدقيق ونقلبهم شوية علي النار عشان الدقيق يستوي شوية .
  • ننزل عليهم بكوباية ماية سخنة مغلية ندوب فيها مكعب المرقة بتاعتنا وأول ما يغلو في بعض نضيف كريمة الطبخ ونقلب وبعدين نظبط الملح والفلفل الأسمر .
  • نجيب شرايح الفراخ اللي حمرناها في الأول وننزل بيها في الكريمة ونسيبهم ياخدو غلوتين علي النار .
  • وبعدين نطفي النار واللي حابب يزينها ب رشة بقدونس وشرايح الليمون .